ہندوستان وچ غریباں دی گنتی دنیا وچ سبھ توں ودھ

کجھ دن ہوئے یوئینؤ نے اک رپورٹ جاری کیتی ہے جس وچ کیہا گیا ہے کہ دنیاں اک تہائی غریب بھارت وچ وسدے ہن جو دنیا وچ سبھّ توں ودھ گنتی ہے۔ اس رپوٹ راہیں یوئینؤ نے اس گلّ دی تصدیق کر دتی ہے جو ہندوستان دے عامَ لوک پہلاں ہی جاندے ہن کہ پچھلے 65 سال دی آزادی نے اوہناں لئی کجھ نہیں کیتا۔ لوکاں دا کوئی وی بنیادی مصلیٰ حلّ نہیں ہویا۔ بھاوے کیندر جاں صوبیاں وچ کسے وی پارٹی جاں گٹھجوڑ دی سرکار رہی رہی ہووے لوک غربت، جہالت اتے بھکھ دے ہی شکار رہے ہن۔

پہلاں بہت چر کانگرس وچ رہِ چکی تے ہن دل بدل کے بھاجپا دی سرکار وچ گھٹّ گنتیاں دے مثلیاں بارے منتری بنی نجمہ ہپتلاہ نے ایہہ رپورٹ رلیز کردیاں بہت ہی ڈھیٹھتائی تے بے شرمی نال کیہا کہ سانوں اس گلّ تے فخر نہیں ہے کہ بھارت وچ سبھ توں ودھ غریب ہن اسدے اس رویئے توں حاکم ٹولے دی بے حیائی ظاہر ہندی ہے تے ثابت ہندا ہے کہ اوہناں کول لوکاں دے مثلیاں دا کوئی حل نہیں ہے۔

رپورٹ وچ ایہہ وی دسیا گیا ہے کہ ہندوستان وچ پنج سال توں گھٹّ عمر دے بچیاں دی موت دنیاں وچ ساریاں نالوں زیادہ ہندی ہے، 60فی صدی لوکاں نوں ٹٹی-پیشاب لئی باہر جانا پیندا ہے تے گربھ دوران دنیاں دیاں 17 فی صدی موتاں وی اتھے ہی ہندیاں ہن۔

اس توں کجھ ہی دن پہلاں رنگاراجن کمیٹی نے وی اک رپورٹ جاری کیتی سی جس وچ کیہا گیا سی سرکار ولوں پہلاں جاری کیتے گئے غریبی دے انکڑیاں نالوں غریباں دی گنتی زیادہ ہے۔ پر رنگاراجن کمیٹی نے کیہا ہے کہ جو انسان اک پنڈ وچ ہر روز 37 روپیہ اتے شہر وچ 45 روپئے خرچ کر سکدا ہے اوہ غریب نہیں۔ ایہہ لوکاں نال اک بھدا مخول ہے۔ اس توں پہلاں من موہن سنگھ سرکار دے مونٹیک سنگھ نے وی ایہو جہی ہی گلّ کیتی سی۔ ہندوستان دی سرکار دے غریبی دی ریکھا اتے غریبی دے انکڑے منگھڑت ہی ہندے ہن۔ غریب دی زندگی دی حقیقت نال ایہناں دا کوئی تعلق نہیں ہندا۔

پر پچھلے 65 سالاں وچ بھاوے کوئی وی پارٹی طاقت وچ رہی ہے، صرف مٹھی بھر امیراں دی دولت بہت ہی ودھی ہے۔ امیراں دی دولت وچ وادھا تے غریباں دی غریبی وچ وادھا پہلاں سوشلزم دے نعرے ہیٹھ اتے پھیر لبرلائیزیشن، پرائیویٹائیزیشن اتے ڈویلپمینٹ دے نعریاں ہیٹھ ہندا رہا جد کہ عامَ لوکاں دے حالات بد توں بدتر ہی ہندے گئے ہن۔

1947 دی آزادی دے بعد ہنّ تکّ ہریک سرکار اتے سیاسی پارٹی نے غریبی دے خلاف جنگ کرن دے اعلان کیتے ہن پر غریبی ودھدی جاندی ہے اتے امیراں دی دولت ودھدی جاندی ہے۔ سرکاراں گلیں باتیں  غریبی ختم کرن دی گلّ کردیاں ہن پر اصل وچ امیراں دیاں جیباں ہی بھردیاں ہن۔ مثال دے طور تے 2014-2015 دے بجٹ سرکار بجٹ دا تقریباً 35 فی صدی حصہ سودخوراں اتے شاہکاراں دے حوالے کریگی زدّ کہ تعلیم اتے صحتَ تے  بجٹ دا صرف  ڈیڑ فی صدی حصہ ہی خرچ کریگی۔

کسے وی سیاسی پارٹی جاں سرکار توں اس دی آس نہیں رکھی جا سکدی کہ اہنھاں وچ لوکاں دا کجھ سوارن دی اچھا جاں حیثیت ہے۔ ایہہ سبھ سرکاراں اتے پارٹیاں حاکم ٹولے دیاں ہی پارٹیاں ہن اتے اوہناں دیاں ہی جیباں بھردیاں ہن۔ لوکاں نوں اکٹھے ہوکے وچار وٹاندرا اتے صلاحَ مشورہ کرن دی اتے غریبی دے مصلے دا حلّ آپ لبھن دی لوڑ ہے۔ ایہدے لئی لوکاں نوں اک نویں سوجھ اتے سیدھ لے کے چلن تے اک نواں راجتنتر بناؤن دی لوڑ ہے۔

ہندوستان اتے دنیاں دا تجربہ دسدا ہے کہ سرمائیداری دا ساجیا موجودہ لوک تنتر اتے کھلھی منڈی لوکاں دی غریبی دور نہیں کر سکدے۔ ایہہ دوہیں وڈے سرمائیدار اتے لوٹو جماعت دے ہتھیار ہن تے ایہناں دے ہی ہتاں وچ کم کردے ہن۔ اس کرکے لوکاں نوں کوئی ہور رستہ بھالنا پویگا۔ دنیا دے اتہاس وچ ایہو جہیاں کئی مثالاں ہن جتھوں سبق لئے جا سکدے ہن تے راہ لبھیا جا سکدا ہے۔ پر لوکاں نوں حاکم ٹولے دے بھلیکھیاں توں بچن تے اکٹھے ہو کے اپنے مثلیاں بارے آپ سوچن اتے لہر چلاؤن دی لوڑ ہے۔